Kim Jong Un chungchangah NKorea media-te an ngawi
North Korea supreme leader Kim Jong Un chu ramdang media-ten a hriselna dinhmun a ṭhat loh thu an sawi a, mahse an ram media-te chuan an hotupa chungchang hi engmah an la sawi lang ve lo.
April 12 khan Kim Jong Un hian lung lam ṭha lo a neih avangin, cardiovascular system procedure hmanga enkawl a nih thu media miten sawiin, Kim dinhmun hi a ṭha lo hle tih an tarlang bawk. Hemi chungchang hi NKorea media-te chuan engmah an la sawi ve lo a, thudik a ni em tih finfiahna a la awm lo a ni.
South Korea online newspaper Daily NK chuan Kim hi cardiovascular system procedure hmanga enkawl a nihna chhan chu a thau vang leh meizial leh hna a thawh nasat avang a nih thu a tarlang.
April 15-a North Korea hnampa piancham lawmnaah Kim hi a kal lo niin media-te chuan an sawi bawk. US National Security Adviser Robert O'Brien chuan US-in Kim chungchangah thudik hriat tuma an ngaihven zui thu a sawi.
US president Donald Trump chuan Kim nen hian inkungkaihna ṭha tak an neih thu a sawi a, a dam ṭhat a rin thu sawi lang bawkin, "Kan thu hriat hi a dik leh dik lo kan hre si lo a, a dinhmun dik tak kan hriat theih thuai ka beisei," tiin Trump chuan a sawi bawk.