Coronavirus vangin khawvel pumah Ei tur khawpkham nei lo a letin pung dawn

United Nations World Food Programme (WFP) chuan khawvela coronavirus lengin ram hrang hrangte economy a nghawng avangin, ei tur khawpkham nei lo chu a letin an pung thei dawn tih a sawi. 

Thawhlehnia report a tihchhuahah, WFP chuan hri leng vanga ram hrang hrangten inkharkhipna an kalpui avangin an sum lakluh a tlakhniam phah nasa hle tih sawiin, hei hian mipuite a nghawng na dawn hle a ni, a ti. Khawvel puma ei tur khawpkham nei lo mi maktaduai 135 awm mek chu, hri leng vang hian mi maktaduai 265-ah an pung thei dawn a ni, a ti. 

WFP-a chief economist leh director of research, assessment and monitoring Afir Husain chuan Covid-19 leng hi dinhmun harsa taka awm mek, mi maktaduai telte tan a rapthlak zual tih sawiin, "He hri leng vanga harsatna awmte chingfel tura lungrual taka kan thawhho a ngai a, a nih loh chuan a nghawng tur hi a rapthlak dawn lutuk a ni. Mi tam takin nunna an chan bakah, ei zawnna chan leh ei tur nei lo mi tam tak an awm dawn," tiin a sawi.