Spain PM in mipui hnenah ngaihdam dil

Spain prime minister Pedro Sánchez chuan an party, Spanish Socialist Workers' party (PSOE) senior member Santos Cerdán chu eiruknaa inhnamhnawiha puh a nih avangin ram mipui hnenah ngaihdam a dil.

Santos Cerdán hi dik lo taka contract pe chhuak a, thamna phutah puhin a finfiahna pawh an nei niin Supreme Court judge chuan a sawi. Cerdán hian an puhna lakah a fihlim niin a sawi thung a, MP a nihna aṭang pawhin a ban tur thu leh, Supreme Court-ah a dikzia pho lan a tum tih a sawi. June 25 hian court-ah a inlan ang.

Supreme Court Judge Leopoldo Puente chuan Civil Guard Central Operative Unit report aṭangin, PSOE secretary Cerdán hian thamna sum phut chungchangah hian transport minister hlui José Luis Ábalos leh a adviser hlui Koldo García te nen an inthurual niin a sawi. Sum an dawn hi Euro 620,000 vel niin report chuan a tarlang bawk a ni.

PM Sánchez chuan ram mipui hnenah ngaihdam a dil a, Cerdan a lo ring chu a ti sual a ni tiin pawi a ti hle tih a sawi. Eirukna chungchang hi engmah hriat a lo nei lo tih a sawi. A kaihhruai sorkar chuan politics thianghlim tak kalpui chhunzawm zel a tum thu leh, eirukna chu ngaihzam mai a ni dawn lo tih a sawi.