Iran-in Israel lakah 'Operation Honest Promise 3' puang

Iran leh Israel chu a ni thumna atan nimin khan an la inbei chhunzawm leh. Iran chuan missile hmanga Israel a kah leh hnuah, Inrinni khan Israel lakah beihpui thlakna, Operation Honest Promise 3 kalpui a nih thu a puang zui bawk. Hemi hma hian Israel chuan Iran nuclear leh missile siamna hmuna beihpui a thlak mek chu Operaton Rising Lion a kalpui mek peng pakhat a nih thu a lo sawi ve tawh bawk.

Iran missile kah chhuah hian Israel-a Bat Yam-a mihring chena hmun fuhin, mi 10 vel an thi nia sawi a ni. Thi zingah hian naupang an tel niin thuneitute chuan an sawi bawk. Tel Aviv leh Jerusalem-ahte pawh thil puak ri hriat tur a awm bawk a ni.

Israel defence minister Israel Katz chuan Iran-in missile hmanga a bei leh a nih chuan Tehran chu a kang chhe vek ang tiin a vau. Iran-in missile a kah hnuah, Inrinni khan Israel chuan drone hmangin Kangan khuaa South Pars refinery a kap zui ve bawk a, Iran oil leh natural gas industry a beih hmasakna ber a ni. Drone hmanga kah a nih hnuah refinery-ah hian kangmei a chhuak zui nasa hle niin an sawi.

Israel sipaite hian Inrinni zan vek khan Iran khawthlang lam, Khorramabad-ah leiverh an kap fuh tih an sawi a, he hmunah hian surface-to-surface leh cruise missile te a awm niin an tarlang. He hmun an kah fuh bakah, a enkawltu senior official-te pawh nuaibo an ni tih Israel sipai thupuangtu, brigadier general Effie Defrin chuan a sawi a ni.

Iran chuan Israel-in a beihna hi US chuan hriatpui leh thlawpah a puh. Mahse US chuan an hriatpui loh thu leh an inrawlh loh thu a sawi. US president Donald Trump chuan Iran hian US a bei let ve a nih vaih chuan, US sipaite chak leh thiltihtheihna chu a hmachhawn ngei dawn tiin a vau. Israel-in Iran laka beihpui thlak hun a la nei dawn tih chu a rin lawk thu a sawi rualin, Iran nuclear leh intelligence facility-te a beihnaa engmah inrawlhna an nei lo tih Trump chuan a sawi.