G7 hruaituten inremna siam thei lo

Canada-a G7 summit hmang zo hman loa US president Donald Trump a haw hnuah, ram dang paruk hruaitute chuan Russia-Ukraine indona leh Israel-Iran buaina thleng mek bakah, khawvel huap thil pawimawh dangah inremna an siam thei ta lo. Inremna mumal siam loin summit hi an ṭiak a ni.

Summit neihna aṭanga hmanhmawh taka President Trump a haw hnuah ram dang paruk - UK, France, Germany, Canada, Italy leh Japan hruaitute chuan Thawhlehni khan summit hi an neih chhunzawm a, Ukraine president Volodymyr Zelenskyy leh NATO hotu Mark Rutte te an tel bawk.

Ukraine President chuan Russia nena an indo meknaah remna leh muanna a awm theihna tur inbiakna neih pawh a inhuam thu a sawi a, hemi atan hian Russia lam pawrh nawr an ṭul thu a sawi. G7 ram hruaitute chuan indona tih tawp an duh thu sawi mah se, Ukraine buaina chungchangah thuchhuah inṭawm pawh an siam thei ta lo a ni.