Covid-19 hri thar hmuhna ram pung zel

Khawvela hripui leng mek, Covid-19 hri chu a tira leng ang ni lo, a chi thar pathum hmuh chhuah belh a ni tawh a, heng hri tharte hi ram eng emaw zatah hmuh an ni tawh. 

Hetih lai hian coronavirus hri thar hmuhte hi a tira leng aiin a hlauhawm bikna hriat a la ni lo a, heng hri tharah pawh hian Covid vaccine-te chu hman theih vek tura ngaih a ni. Mahse UK-a hri thar hmuh erawh chu 70% in inkaidarh a awlsam zawk nia sawi a ni thung. 

United Kingdom-ah December 14 khan Covid-19 hri thar  hmuh a nih thu hi report a ni a, a hmingah  VUI-202012/01 (the first Variant Under Investigation in December 2020) tia vuah a ni. He hri thar hi September thla laihawl vel aṭang khan a rawn lang ṭan nia hriat a ni. South Africa-ah hri chi dang, 501.V2 tih chu kar liam ta khan hmuh chhuah a ni a, December 24 khan Nigeria-ah hri chi dang leh, P681H tih chu hmuh a ni leh bawk. 

Coronavirus hri thar hmuh tawhna ram hrang hrangte chu -

Australia : December 21 khan Australia health official-te chuan UK aṭanga haw mi pahnihah coronavirus hri thar hi hmuh a nih thu an sawi. 

Denmark : World Health Organisation chuan Denmark ramah hri thar hi mi pakuaah hmuh a nih thu a tarlang. 

Canada : Health official-te chuan December 26 khan Ontario province-ah UK-a hmuh chhuah ang, Covid-19 chi thar chu mi pahnihah hmuh a nih thu an sawi. 

France : December 25 khan France chuan Britain aṭanga haw, mi pakhat chuan Covid-19 hri thar hi a kai tih hmuhchhuah a nih thu a tarlang. Symptom a nei lo a, inkhunghran tir nghal a ni. 

Italy : Italy-ah chuan December 20 khan UK aṭanga haw, mi pakhatin hri chi thar hi a kai tih hriat a ni a, December 23-ah mi dang pakhatin a kai tih hmuh chhuah a ni leh bawk. Hri chi thar kai hmuh chhuah hnuhnung zawk hi zin chhuahna nei lo nia sawi a ni bawk. 

Japan : December 25 khan Japan chuan UK aṭanga haw, mi panga in inkaidarh awlsam tak nia sawi, hri chi thar hi an kai tih hmuh chhuah a nih thu a sawi. 

Jordan : Health minister chuan December 27 khan tun hnaia UK aṭanga haw, mi pahnihin hri chi thar hi an kai tih a sawi. 

Lebanon : December 21-a London aṭanga thlawhtheihna hmanga haw mi pakhat chuan hri chi thar hi a kai tih hmuh chhuah a nih thu health minister chuan a tarlang. 

Nigeria : Disease control body hotu chuan December 24 khan an ramah coronavirus hri chi thar hmuh chhuah a nih thu a puang. He hri thar hi mi pahnih sample endiknaah hmuh a ni tih a sawi a ni. 

Singapore : Singapore chuan UK-a hmuh chhuah ang, Covid-19 hri chi thar kai chu an ramah hmuh a ni tih December 24 khan a sawi. November 17- December 17 inkara UK aṭanga haw, Covid-19 kai mi 31 zingah an zinga pakhat chuan hri chi thar hi a kai tih hriat a nih thu  health ministry chuan a tarlang. 

Spain : December 26 khan Spain chuan coronavirus hri chi thar hi mi paliah hmuh a nih thu a puang. Heng mite hi UK-a zinte nena inhnimhnaihna nei vek an ni. 

South Africa : South Africa-ah hian UK-a hmuh ang ni lo, Covid-19 hri chi dang chu kar liam ta khan hmuh chhuah a ni a, 501.V2 tia vuah a ni. Original virus aiin inkaidarh a awlsam nia sawi a ni.

South Korea : Souht Korea official-te chuan December 28 khan December 22-a London aṭang haw chhungkaw khat, member pathumah Covid-19 hri chi thar hi hmuh a nih thu an sawi. 

Sweden : UK-a hmuh chhuah thar, Covid-19 hri chi thar chu Sweden-ah pawh a kai hmuh chhuah an ni tih Swedish Health Agency chuan December 26 khan a puang. 

United Kingdom : Health secretary Matt Hancock chuan December 14 khan England chhim lamah coronavirus chi thar kai mi 1,000 chuang hmuh an ni tih a sawi. December 23 khan South Africa-a hri hmuh ang chi kai mi dang pahnih hmuh an ni leh tih a sawi bawk.