Duterte-a'n US sawisel leh

Philippines President Rodrigo Duterte-a'n midangte sawichhe zawnga chhechham a tum tawh toh thu a sawichhuah hnuah, Nilaini khan US chu a sawichhe leh a, America mite chu zawng (monkey) tiin a sawi.

Report ṭhenkhatin Philippines rama human rights palzut a nih vangin, US State Department-in Philippine National Police hnena assault rilfe 26,000 hralh tum a titawp nia sawi chungchang a chhannaah Duterte hian he thu hi a sawichhuak a ni. "Heng zawng ho hi han en teh u. Kan hnena assault rifle 26,000 hralh tur chu an titawp a, sawnchhia mai an ni. Airguns chu a dang a tam. America mite hi mi a mai an ni" a ti.

Philippines sorkar inrelbawlnaa inrawlhah US a puh bawk a, ṭawngkam chhe tak hmanga an inbeihna chu US bul ṭan a nih thu a sawi. America ram a zahna pawh a hloh zel tih sawiin, an laka a hawihhawm loh chhan chu an mahni an hawihhawm loh hmasak vang zawk a ni tih a sawi.

Duterte chuan Philippines chu ram khat, thuneihna hran nei a ni a, US chuan a ram awp ang maiin a en tur a ni lo tih a sawi. US chuan Philippines chu a ui vulh, a pu thu a awiha ei tur dawng thei tur ang chauhin a ngai a ni, a ti. US chuan Iraq leh Libya te a tihchhiat hnuah, Syria pawh a tichhe leh tawh tih a sawi bawk.