Jerusalem-a Ṭahna Bang-ah buaina chhuak

Jerusalem-a Juda-te hmun thianghlim, Ṭahna Bang (Western Wall)-ah liberal Judaism leh Orthodox Jews-te inkarah buaina a chhuak.

Orthodox Jews-te chuan Jerusalem Old City-a Ṭahna Bang-ah hian hmeichhiate tan ṭawngṭaina hmun hran siam an duh a, hetihlai hian liberal Judaism chuan mipa leh hmeichhiate chu ang khata zalenna pek an duh thung a, hemi atan hian an campaign mek a ni.

Nilaini khan liberal Judaism thlawptuten hmun thianghlim an thlen hian Orthodox Jews-te chuan lo dangin, Torah lehkha an ken pawh an lo chhuhsak a ni. Police-te chuan Torah ken phalna hi an pe a, Orthodox thuneitute hi an hriattir lawk lo nia sawi a ni.

Unio for Reform Judaism president Rabbi Rick Jacobs chuan Ṭahna Bang chu Juda mi zawng zawngte zalen taka an kal vek theihna tura siam an tum tih a sawi. Ṭahna Bang hi Bible-a lang Juda temple pahnih hungna bang a ni a, Juda-te tan hmun thianghlim a ni. A awmna compound hi Juda-te chuan Temple Mount an ti a, Muslim-te'n Haram al-Sharif an ti thung.

Orthodox Jews-te chuan Ṭahna Bang tlawhtu hmeichhiate chu a hrana ṭawngṭaiin, lehkhabu thianghlima thute chu a riin an chhiar ve tur a ni lo, an ti. Rabbi Shmuel Rabinowitz chuan hmeichhiate leh mipate awmkhawma an ṭawngṭai ho ṭhin chu Ṭahna Bang zah lohna lian tak a ni, a ti. Kumin kumtir lam khan Israel cabinet chuan mipa leh hmeichhiate a ruala an ṭawng-
ṭai theihna hmun tur siam hi a lo pawm tawh a, mahse Orthodox party lam nawrna avangin tun thlengin siam a la ni lo.