Khawvel Lawrkhawm

Japan-in Myanmar sorkar thlawp zel dawn

Japan Prime Minister Shinzo Abe chuan Myanmar rama mipui thlan sorkar ding chu an thlawp zel dawn tih a sawi.

Myanmar State Counselor Aung San Suu Kyi-i nen Tokyo-a an inkawmnaah, Abee chuan Myanmar chu an ram ṭhian ṭha a nih thu hi sawiin, kum nga chhung atan Myanmar ram puihna turin US dollar tluklehdingawn 7.73 an pek tur thu a sawi.

Suu Kyi-i hi ni nga cham turin Japan-ah hian a zin a, ram hruaitute kawmin Myanmar rama Japan Overseas Cooperation Volunteer tirhna tur inremna pawh an ziak a ni. Tun ṭum hi Myanmar rama National League for Democracy party kaihhruai sorkar a din hnuah Japan ram a tlawhna hmasa ber a ni. Kum 2013 khan parliament eptu member a nih laiin a lo zin tawh bawk.

Calais camp-a kum tling lo awmte sawn darh

France sorkar chuan Calais-a raltlante awmna camp a ṭhiah hnuah, he camp-a khawsa kum tling lo awmte chu ram≠chhunga reception centre hrang hrangah a sawn darh.

Calais camp-ah hian chhungte puitling kaihruaitu nei lo, kum tling lo mi 1,500 vel an awm a ni. He camp-a raltlan awmte hi Britain pan tumte an ni a, mahse Britain-in kum tling lo, an rama chhungte awm lo te chu a lakluh theih loh thu a sawi hnuah, centre hrang hrangah sawn darh an ni ta a ni. Camp-a kum tling lo awmte hi bus 30 hmangin centre 60-ah sawn an ni.

NASA-in space telescope lian ber a siam zo

US space agency NASA chuan kum sawmhnih dawn hnuah khawvela space telescope lian ber a siam zo ta.

James Webb Space Telescope hi NASA-in kum 26 zet a lo hman tawh, Hubble Space Telescope thlakna atan hman a ni dawn nia sawi a ni. Webb telescope hi van thengrenga thil awmte zirchianna atan hman a ni dawn a, a siamna atan hian dollar tluklehdingawn 8.7 ruahman niin, NASA hi European Space Agency leh Canadian Space Agency ten an pui bawk a ni.