Israel-in Hamas hren ruang pathum la chhuak

Israel sipaite chuan Pathianni khan Palestinian firfiak pawl, Hamas in October 7, 2023-a Israel an beih ṭuma an thah, Gaza Strip-a an ruang an kawl zui tak zinga mi pathum ruang chu an la chhuak tih an sawi.

Israel sipaite chuan ruang an lak chhuahte hi Yonatan Samerano, 21; Ofra Keidar, 70; leh Shay Levinson, 19 te an nih thu sawiin, October 7-ah khan Hamas te hian an kap hlum a, Gaza Strip-ah an ruang hi an kawl zui tih an sawi. Heng mi pathumte ruang la chhuak tura beihpui an thlak dan kimchang erawh an tarlang lo.

Prime minister Benjamin Netanyahu chuan Hamas-in Israel an beih ṭuma an mi man leh ruang an la hrente chu lak chhuah vek an tum tih a lo sawi fo tawh a ni. Hamas in Israel an beih khan mi 1,200 vel thatin, a tam zawk chu civil mi an ni. Mi 251 manin Gaza-ah an hreng zui bawk. An mi hreng zinga nungdama awm mi 148 leh ruang pariat chu mi tang inthlengna tura inremna an siam hmangin Israel hnenan an hlan tawh a ni. Tunah hian mi 50 an la hreng mek a, an zinga 27 chu an thi tawh niin Israel chuan a sawi.