UK-in Palestine Action dan pawnah hnawl dawn

Britain sorkar chuan Palestinian thlawptu pawl, Gaza Strip-a Israel beihpui thlakna leh UK-in Israel a thlawpna duh lohna lantirtu, Palestinian Action chu antiterrorism law hmangin dan pawnah a hnawl dawn.

Palestine Action activist-te hian Thawhṭanni khan London-a Trafalgar Square-ah nawrh huaihawtin, police-te nen an innawr buai a ni. Kar hmasa khan he pawl member-te hi central England-a Royal Air Forece (RAF) base-ah lutin military aircraft pahnih an ti chhe bawk. Palestine Action chuan he thil thleng video hi X-ah tarlangin, mipuiten Israel sorkar chetdan an dem chungin Britain sorkar Gaza-ah US leh Israel fighter jet-te fuel pe turin thlawhtheihna a tir lui tho a ni, an ti. An pawl member pahnih chuan Oxforshire-a RAF Brize Norton military base-a Voyager aircraft engine-te chu rawnga kapin, hmanraw dang nen an bei bawk tih an sawi. Hei bakah Palestine flag pawh an dal tel bawk a ni.

UK prime minister Keir Starmer chuan he thil thleng hi na taka demin, MP hrang hrang pawhin Palestine Action chet dan chu an sawisel bawk a ni. Hemi hnu hian sorkar chuan antiterrorism law hmangin he pawl hi dan pawnah hnawl a ni dawn tih a sawi a ni. He dan hnuaiah hian Palestine Action pawl chawi lar emaw, a pawl member nih emaw chu danin a khap a, dan bawhchhiate chu kum 14 thleng lung-in tan tir theih an ni ang. He dan hnuaiah hian Hamas, Hezbollah leh al-Qaeda or ISIL (ISIS) te pawh dan pawnah hnawl an lo ni tawh bawk.