Khawvel Lawrkhawm
El Salvador hruaitu hlui chenna in dap
El Salvador President hlui Elias Antonio Saca chenna in chu Nilaini khan police-teín an dap.
Kum 50 mi, Saca hi Pathianni khan sorkar sum tam tham tak tichingpena puhin man a lo ni tawh a ni. Investigator-te chuan a sum tihchingpen finfiahna tur document zawngin a in hi an dap a, mahse thil pawimawh hmuh an nei lo niin an sawi.
President nena inkaihhnawihna nei hmun hrang hrang dap an lo ni tawh bawk a, radio station leh car zawrhna hmunte pawh an dap tawh a ni.
Kum 2004-2009 inkara El Salvador President a nih lai khan Sacca hian sorkar sum dollar maktaduai 246 zet chu a private account-ah a la peng nia puh a ni.
In 149 neitu chhui chiang
China rama hnathawktu pakhat chu in leh ram a ngah avangin chhui chian a ni dawn.
China chhimchhak lam, Jiangxi province-a Nanchang City-a Peopleís Procuratorate-a thawk, Xu Linbao chu khawpui chhunga in 149 zet neiah puh a ni a, hei bakah hian ram pawh eng emaw zat a nei bawk. A thil neih hlut zawng hi US dollar maktaduai 16 (yuan maktaduai 110) hu a tling.
Procuratorate chuan Xu leh a chhungte hian kum 1995-2015 inkar khan in te hi an lei niin a sawi a, hetihlai hian Xu hian local bank hrang hrangah loan a ba a, a loan bat zat hi an ram pawisa yuan maktaduai 96 chuang a ni. October thla khan a hna aṭangin suspend a ni tawh bawk. Xu hi a makap, Long Yuewu nen dik lo taka sum lakluhna tur siamah puh a ni a, a maka hi October khan sum tihchingpen vangin man a lo ni tawh bawk.
Italy-ah lir a nghing leh
Magnitude 5.0-a nain nimin zing khan Italy-ah lir a nghing leh.
US Geological Survey chuan nimin zinga lir nghinna hmun hi tunhnai lir lo nghin tawhna kha a ni tih a sawi. Nimin zing dar 1.35 khan lir hi a nghing a, a nghin ṭanna hi Perugia chhimchhak lam mel 32 vela hla, lei hnuai mel 6.2-a thukah a ni. He bialah hian vek hian October 26 khan magnitue 5.5 leh 6.1-a nain lir a lo nghing tawh a ni. August thla khan Italy rama lirghing na tak avangin mi 300 zet an lo thi tawh a ni. Nimin zinga lir nghing hian thil tihchhiat lian tham a neih hriat a ni lo.