SKorea President-in a tihsual thu a puang

South Korea President park Geun-hye-i chuan sorkar inrelbawlna chungchangah a
ṭhianṭha pakhat, sorkara nihna pawimawh engmah nei lo a inrawlh tir chu ama tihsual leh thiam loh a nih thu a sawi.

President Park-i hian a ṭhian hlun tak, Choi Soon-sil-i chu sorkar policy leh thutlukna siamahte a inrawlh tir bakah, President a nihna anga a thusawi turte pawh a siamṭhat tir nia puh a ni. He thil thleng vang hian Choi-i hi hren a ni tawh bawk. President chuan a ṭhiannu-in sorkar document pawimawhte a neih chungchangah mawhphurhna a lak thu a sawi.

Park-i chuan a thiltih chung≠chang chhui chian tumna pawh a remti dawn tih sawiin, dik lo taka thilti chu hrem an ni ang, a ti. Heimi rual hian a rorelna kawng thlenga nghawng a nei nia sawi erawh chu a pha thung. Hetihlai hian eptu lam chuan President hian ama duhthlan ni lo, parliament-in prime minister atana a ruat chu a pawm a ngai tih an sawi a, a pawm loh chuan President a nihna aṭanga bang turin an nawr dawn tih an sawi bawk.

Sorkar inrelbawlnaah Choi-i inhnamhnawih dan hriatchhuah a nih hnu hian President chuan a cabinet a siksawi a, prime minister pawh a thlak a ni. Mahse PM atana a thlan chhuah hi eptu lam chuan an pawmpui lo.

TV-a thu a sawiah, President Park-i chuan Choi-i chu a ṭhianṭha tak, hun harsa ber a tawh lai pawha a tana ding reng a ni tih a sawi a, mahse sorkar inrelbawlna thlenga a inrawlh tir chungchangah a tih loh tur a ti tih a pawm thu a sawi. Choi-i hi President nena an inhmelhriatna hmang ṭangkai a, sumdawngte hnen aṭangin a foundation pahnih enkawl tana sum tam tak laksakah an puh.

Ningani khan Seoul Central District Court chuan Choi-i manna tur thupek tihchhuak tura prosecutor-te ngenna chu pawm a nih thu a sawi.