Khawvel Lawrkhawm

Somalia Parliament bulah car bomb puak

Somalia khawpui, Mogadishu-a Parliament building bulah kar kalta Inrinni khan car bomb a puak a, sipai pahnih an thi a, mi dang panga-in hliam an tuar.

Bomb hi Sayidha junction checkpoint-ah army convoy beihna turin tihpuah a ni a, al-Shabab firfiak pawl chuan an tih niin an chhal.

Bomb tipuaktu hian a tam thei ang ber tihnat a tum a, mahse motor rual tlan zinga pakhat chu a fuh niin Captain Mohamed Hussein chuan a sawi.

He pawikhawihna thlen hnu hian al-Shabab radio station, Andalus chuan car bomb chu an pawl mi pakhatin, sorkar sipaite beihna atana a tihpuah a nih thu a puang

S. Sudan mipuiten tam hmabak

South Sudan rama tualchhung indona thleng mek avangin an ram mipui zahve dawn chuan ei tur mumal nei loin an awm mek a, an ṭam mai a hlauhthawnawm hle niin United Nations World Food Program chuan a sawi.

Tualchhung indona thleng avang hian mi tam tak chuan an in leh lo an tlanchhiatsan a, an thlai chinte enkawl zui thei loa an awm avangin thlai thar chhuah thlengin a nghawng thei dawn a ni. Kum hnih chhung zet tualchhung buaina a thlen tawh avangin an ram sum dinhmun thlengin a tuar tawh a, thil man a sang chak a, hei bakah hian an thlai chinten ruahtui tlak ṭhat loh an tuar nasa hle bawk. World Food Program chuan South Sudan mipuite ei leh in lama ṭanpuina tur hian, thla ruk chhungin dollar maktaduai 230 mamawh a nih thu a sawi.

Italy coastguard-te’n mi 2,000 chuang chhanchhuak

Italy coastguard-te chuan Europe-a pem tuma kal, mi 2,200 chu kar katla Inrinni khan Mediterranean tuipuiah an chhanchhuak a, mi 10 ruang hmuh a ni bawk.

International Organization for Migration chuan Europe-a pem tum, mi 4,220 chu Mediterrean tuipuia chetsualnaah an thi tawh niin an sawi a, kum 2015 khan mi 3,777 an lo thi tawh bawk. Kumin November 2 thleng khan Mediterranean tuipui kaltlang hian Italy ramah mi 159,496 an lut tawh a ni. Europe-a dinhmun ṭha zawk beiseia luh tum zinga a tam ber hi Africa ram aṭanga kal an ni.