Iraq PM-in IS te ralthuam dah turin vau

Iraq Prime Minister Haider al-Abadi chuan Mosul khawpuia Islamic State (IS) firfiakte chu dam khawchhuah an duh a nih chuan an ralthuamte dah turin a vau. Mosul khaw mipuite chu firfiakte kut aṭanga an chhuah zalen thuai tur thu a sawi bawk.

Iraq sipai leh an thurualpui≠te chuan IS kut aṭanga Mosul khawpui la let tura beihpui an thlaknaah hma an sawn zel a, Mosul khawchhak lam daiah an lut tawh a ni. Inrinni khan khawpui chhim lam mel 10-a hla a awm, Hammam al-Alil pawh an la tawh bawk. Lieutenant-General Raed Shakir Jawdat chuan sipaite chuan he khawpuia hmun pawimawhte chu a la let vek tih a sawi a, khawchhungah firfiak chambang an awm leh awm loh erawh a sawi chiang lo.

Mosul khawpui chhehvelah Iraq sipai leh firfiakte hi an inkap nasa hle a, IS firfiakte hian Mosul hmarlamah sipai lut turte lo danna tur eng emaw zat an siam. Khawpui chhunga kawngpui pawimawhte pawh concrete bang leh thil dang hmanga dan a ni bawk.

IS hian Iraq sipaiten beihpui an thlak hnuah, Mosul khua
aṭanga tlanchhiat tum an pawl member 50 chuang an kap hlum tawh bawk. Sipaiten khawchhung an lut dawn tih hriaa insaseng tum, firfiakte hi an pawl mi vek ten an kap hlum a ni. IS hian khawpui chhunga sorkar hnathawk, an lam ṭang ni lo nia an hrait mi 150 chuang an kap hlum tawh bawk.