SKorea President thawhpui pahnih manna thupek tichhuak

South Korea prosecutor-te chuan President Park Geun-hye-i kaihhruai sorkar-a eirukna thleng nia an chhuina kal zelah, President thawhpui ṭhin mi pahnih manna tur thupek an tichhuak.

Man tura tihte hi Park-i senior secretary hlui Ahn Jong-beom leh, a private secretary hlui Jung Ho-sung-te a ni a, inbumna hmang leh thuneihna dik lo taka hmangah puh an ni.

President Park-i chuan sorkar inrelbawlnaa a ṭhianṭha, sorkara nihna pawimawh nei lo Choi Soon-sil-i a inrawlh tir chungchangah an ram mipuite hmaah thupha a chawi tawh a, ama tihsual a ni tih a pawm thu pawh a sawi. Mahse he thil thleng vanga President aṭanga bang tura phutna erawh a pawm lo.

He thil thlen hnua mipuite ngaihdan lakah, President Park-i duhtu hi 5% chauh an ni a, SKorea President ṭanglai zinga thlawptu nei tlem ber a ni.

Seoul khawpuiah President hi bang tura phutin nawrh huaihawt a ni fo a, kar kalta Inrinni zan khan Seoul leh khawpui dangah kawng zawh huaihawt a ni leh bawk. Seoul-a Gwanghwamun Square-ah mi 45,000 vel an pungkhawm a, kawngzawh huaihawt a nih avang hian president chenna, Blue House veng turin police officer 18,000 dah a ni. Blue House hi Gwanghwamun Square aṭanga km 1-2 vel chauha hla a ni.