Clinton-i thubuai siamsak dawn lo

US President thlanna neih tura Democratic Party candidate, Hillary Clinton-i chu US Secretary of State a nih laia sorkar thilah a private email a lo hman chungchangah thubuai siam≠sak a ni dawn lo tih FBI Director James Comey chuan a sawi.

James Comey chuan email chung≠changa kumin kumtira thutlukna an lo siam tawh chu, Hillary-i email-te an ennawn leh hnuah pawh a danglam lo tih a sawi. He thu hi Pathianni khan Congress hnenah a hriattir a ni.

Kar hmasa khan Clinton-i nena inkaihhnawih email thawnchhuah dang chu Clinton-i pasal, Bill Clinton-a thawhpui hnai tak Huma Abedin khawlah hmuhchhuah nia tarlan a ni. Comey chuan FBI investigative team chuan message thar hmuhchhuah a nih hunah enfiah leh a nih tur thu a sawi a, hetihlai hian Clinton-i chu secretary of state a nih laia email a dawn leh thawnchhuahte chu an ennawn vek hnuah, thubuai siamsakna tur khawp nia an ngaih loh thu a sawi.

Republican Party president candidate, Donald Trump chuan FBI thutlukna siam chu sawisel nghalin, Clinton-i humhim tumah a puh. Trump chuan a thiltih chungchangah Hillary Clinton-i hi a dik lo a, hei hi amah pawhin a hriat a, FBI leh ram mipuite pawhin an hrechiang a ni tiin, November 8-a vote thlak hunah America mipuite chuan rorelna dik an lantir a ngai a ni, a ti.