Gaza-a inbeihnaah Israel sipai 7 an thi

Israel army chuan Gaza Strip-a inbeihnaah an sipai pasarih an thi tih nimin khan a sawi a, sipai thite hi kum 19-21 inkar vek niin an zinga pakhat chu platoon commander a ni. An vai hian 605th Combat Engineering Battalion-a mi an ni.

Israel Defence Force chuan heng sipaite chuanna, Puma armored combat engineering vehicle-ah hian firfiakten bomb lo kamin, Khan Younis-a an tlan laiin a puak ta niin an sawi. An motor pawh a kang chhe hneh hle.

October 7, 2023-a Palestinian firfiak pawl, Hamas-in Israel an beih avanga Gaza Strip-a beihpui an thlaknaah Israel sipai 430 chuang an thi tawh a ni.

Iran nena ni 12 an inbeih hnuah Thawhlehni khan inkahhai an puang thei ta a, hei vang hian Gaza Strip lamah an insawrbing chho leh tawh dawn tih Israel sipai Eyal Zamir chuan a sawi. "Tunah chuan Gaza lamah Hamas mi hren mekte hruai haw tur leh Hamas paihthla turin kan insawrbing leh tawh dawn a ni," a ti.

GHF tan USD mtd 30 pe dawn

US sorkar chuan Gaza Strip-a chhawmdawl hna thawk tura Israel leh US-in a thlawp, Gaza Humanitarian Foundation (GHF) tan USD mtd 30 a pe dawn.

Gaza Humanitarian Foundation hi Israel ruahmanna hnuaia kumin kumtir lama din niin, US sorkar pawhina thlawp a ni. Mahse he foundation hi Palestinian leh UN lam chuan sawiselin, Gaza-a hna an thawhna turah UN hnuaia agency hrang hrangte chuan an thawhpui dawn lo tih pawh an lo sawi tawh a ni.

US chuan Gaza Humanitarian Foundation a thlawp thu lo sawi tawh mah se, tun ṭum hi sum lama puihna a pekna hmasa ber a ni thung. He foundation hian private firm-te chu chhawmdawlna thawn luhna leh sem darhna kawngah an hmang a ni.