House of Representatives-in relief package US dollar vbc 484 pawm ve leh
United States (US) Senate-in Thawhlehnia a pawm tak, relief package US dollar vaibelchhe 484 chu House of Representatives chuan Ningani khan a pawm ve leh.
US-in Covid-19 donna kawnga relief package a siam hi a vaiin US dollar 3 trillion dawn a ni ta a, a hmain khawvela relief package lian ber ni turin US dollar 2.3 trillion chu a lo siam tawh bawk.
Ningania Democratic party member tamna House of Representatives ṭhukhawm chuan voice vote hmangin he package hi an pawm a, he package pawm duh lamah hian vote 388 a tla a, duh lo lamah vote 5 chiah a tla thung. House pahnihin a pawm tak package hi president Donald Trump-a'n a hming a sign hnan thei tawh dawn a ni. .
House of Representatives-in a pawm tak relief package bill, US dollar vaibelchhe 484 zinga US dollar tld 380 chu sumdawng tenau (small business)-te tana ruahman a ni a, USD tld 75 chu hri kai enkawl tamna hmun damdawi-in te hman tur atana tih a ni bawk. US dollar tld 25 chu hri kai test-na leh a kaihhnawih hmanrua leina tur atana tih a ni thung.
Covid-19 vangin US-ah hian hna chan mi maktaduai 22 chuang an awm tawh a, hengte avang hian package hi siam a ni. US-a sumdawng tenau zawkte ṭanpuina tur leh hri lengin a tihbuai hospital-te puihna turte bakah, damdawi hmanrua lei belhna tur atan relief package hi siam a ni.
US hi khawvel Covid-19 hri kai tamna ber leh he hri vanga thi tam berna ram a ni mek a, US-a hri kai zat hi mi 886,709 an tling tawh a, chung zinga mi 85,922-te chu enkawl dam tawh niin, mi 50,243-ten he hri hi an thihpui tawh bawk.