Ni zungin Covid-19 hrik a tihlum thei : US research
US Department of Homeland Security-in advance bio-containment lab-a zirchianna a neihah, Covid-19 hrik chu ni zungin a chhunin a tihlum thei a, khawlum leh boruak hnawng (humid) in he hri dam chen hi a titawi thei bawk tih an hmuchhuak niin White House chuan a tarlang.
He zirchianna chungchang hi US sorkarin official-a a vawikhat tih chhuahna a ni. "Ni zung hian boruak leh surface-a hri awm chu a tihlum thei a, hetiang chiah hian kan zirchiannaah chuan boruak lum leh hnawng pawhin a ti thei a ni," tiin US Department of Homeland Security science and technology directorate chief Bill Bryan chuan a sawi.
"Hrik hi 5-gallon bucket-ah khungin, room chhungah chuan kan chhuah a, room chhung chu temperature sang, humidity sang leh ni zung (UV) in kan chhun a, hetiang hian hri hi kan zirchiang a ni," tiin Bill Bryan chuan a sawi a ni.
Room-a temperature 70-75F leh humidity 20-80% a dah chuan hri dam rei zawng darkar 18 chu darkar rukah a titawi a, temperature hi 95F a tihsan leh a nih phieh chuan hri dam rei zawng hi minutes 60 lekah a tlahniam a ni. Temperature sangah leh humidity sangah hri dam theih chin hi a chanveah a tlahiam thei a ni tiin Bryan chuan a sawi. Heng thilte hi Maryland-a DHS-a advance bio-containment lab aṭanga an zirchian a nih thu Bryan chuan a sawi bawk.
Bryan chuan Covid-19 hri inkai chhawn dan hi hriat chian a la nih loh thu sawiin, an zirchianna chuan he hri beihna kawngah a puih tur thu a sawi bawk a ni. DHS team chuan bleach leh isopropyl alcohol chu hri kaite chil leh respiraotry fluid-ah enchinna an neih thu Bryan chuan a sawi bawk a, minute 5 chhungin bleach hian hri hi a tihlum thei a, isopropyl alcohol hian second 30 chhung lekin a tihlum thei bawk a ni, tiin Bryan chuan a sawi.
President Trump thusawiin sawizui a hlawh
US sorkarin Covid-19 zirchianna an neihnaah bleach leh isopropyl alcohol-in hun rei lote chhungin natna hrik a tihlum thei nia an hmuhchhuah thu an sawi a, hei vang hian US president Donald Trump chuan hri kai damlo enkawlna atana disinfectant hmanga jection a ṭhat a rin thu a sawi zui. Hei bakah Trump chuan dam lo taksa chhung chu UV light hmanga chhun/ kah a rawt tel bawk a ni.
Trump thusawi hi damdawi lam thiamte chuan na takin an sawisel nghal a, thil hlauhawm tak a thlen theih thu an sawi. Mihring taksaa cleansing product lam chi thun luh chu thil awm lo leh hlauhawm tak a ni tiin, mahni intihhlum tum ten an tih ṭhin dan zawk a ni, an ti.