Oxford University siam Covid-19 vaccine Mihring taksaah enchhin ṭan

Oxford University siam Covid-19 vaccine chu UK-ah Ningani khan mihring taksaah enchhin ṭan a ni. He damdawi siamtute chuan an vaccine siam hi 80% hlawhtlinna a awm nia an ngaih thu an sawi. 

Coronavirus vaccine trial programme, "ChAdOx1 nCoV-19" kalpuina tur hian UK sorkar chuan pound maktaduai 20 a ruahman a, health secretary Matt Hancock chuan Covid-19 vaccine siamchhuah a nih ngei theihna turin sorkar chuan theihtawp a chhuah dawn a ni, a ti. 

Vaccine an enchhin hi chimpanzee virus aṭanga siam niin, volunteer kum 18-55 inkar, hrisel tha te taksaah enchhin a ni ang. Vaccine enchhinna tura inpe, volunteer-te chu pound 625 pek an ni awn a, May thla laihawl thlengin volunter 500 vel an beisei a ni. 

Oxford vaccine siamna hna thawhnaah hian Professor Sarah Gilber chu a hotu niin, immunity leh human genetics scientist-te pawh telin, January thla aṭang khan an thawk ṭan a ni.