'Iran nuclear hmunte nasa taka tih chhiat a ni' - CIA Director

US-in Iran nuclear hmun pathum an bomb chungchangah, Defence Intelligence Agency (DIA) report in nuclear hmunte hi an chhe nasa lutuk lo a, thla rei vak loa din thar leh a ni thei mai dawn nia a sawi chu US spy agency, Central Intelligence Agency (CIA) director John Ratcliffe chuan chhangin, nasa taka tih chhiat an ni a, din thar leh tur chuan kum eng emaw zat a ngai dawn niin a sawi.

DIA report hi US president Donald Trump pawhin na taka sawiselin, thu dik lo a nih thu a lo sawi tawh bawk. Fake news media-te chuan thu dik lo an tarlang a ni, a ti. An ram sipaite beihpui thlakna hlawhtling ber zinga mi sawi nep an tumna niin a sawi. American pilot-te, a bik takin Iran nuclear site bomb-tute zahawmna vawnghim turin US secretary of state Pete Hegseth leh sipai official dangte chuan Pentagon-ah news conference pawh an neih thuai tur thu a lo sawi tawh bawk.

CIA Director Radcliffe chuan thu rintlak tak an dawn aṭangin, US ebihpui thlakna avang hian Iran nuclear facility pawimawhte chu nasa taka tih chhiat niin, din thar leh mai pawh a hautak dawn hle tih a sawi. He beihpui thlak chungchangah sawi dan hrang a tam a, an ram tana thil pawimawh tak a nih avangin thil awmdan chu mipuite hnenah langtlang taka hriattir zel a tum thu pawh a sawi bawk a ni.

National Intelligence director, Tulsi Gabbard pawhin Iran chuan Natanz, Fordo leh Esfahan-a nuclear facility te hi a din thar leh dawn a nih pawhin kum tam tak a ngai dawn a ni, tiin a sawi ve bawk a ni.

Iran foreign ministry thupuangtu, Esmail Baghaei pawhin Nilainia Al Jazeera-in a kawmnaah an nuclear hmunte chu a chhe nasa hle tih a sawi a, a bak erawh a sawi belh lo thung. Israeli Atomic Energy Commission chuan US beihna avang hian Fordo-a infrastructure pawimawh tak chu a chhe vek a ni, a ti.

US sipai chuan Iran nuclear site beihna atan hian GBU-57 bunker-buster bomb 14 an hmang tih an sawichiang tawh bawk a, pakhat hi kg 13,000 chuanga rit a ni.