Japan-in surface-to-surface missile enchhin

Japan chuan a vawi khatna atan a ram chhungah surface-to-surface missile a enchhin. Hei hi China do let thei tura a sipaite pawh thuam chak tura a hmalakna pakhat nia ngaih a ni.

Missile hi a hma pawhin alo enchhin tawh ṭhin a, mahse a ram chhungah ni loin US-a an base-ah a nei ṭhin. Mahse ram pawnah enchhinna neih hi a hautakin, a tel theih tur zat pawh bithliah ṭhin a ni a, hei vang hian a vawi khatna atan anmahni ram chhungah a enchhin ve ta a ni.

Japan Ground Self-Defence Force (JGSDF) chuan Type-88 missile hi Hokkaido thliarkara Shizunai Anti-Air Firing Range aṭangin an kap chhuak a, km 40 vela hlaa awm, Hokkaido chhim lama lawng chu an kap a ni.

Chief cabinet secretary, Yoshimasa Hayashi chuan missile enchhinna neihah hian sipai 300 vel an tel tih sawiin, hei hi an ram sipait training pekna remchang tak a nih thua sawi. An ram venhimna turin drill neih ṭhin chu a pawimawh hle tih a sawi bawk. Missile an enchhin hi eng ram emaw tih chhana neih a ni lo tih a sawi a, mahse Japan hian a hmain China chu an ram himna chungchangah ngaihven ngai a nih thu a lo tarlang tawh thung.