Spain-in Covid vaccine la duh lote chhinchhiah dawn

Spain sorkar chuan Covid-19 vaccine la duh lote hming chu chhinchhiahin, European Union member ram dangte hnenah a hriattir ṭhin dawn. 

Hemi chungchang hi health minister Salvador Illa chuan sawiin, Covid-19 chu an ram mipuite hnenah la ngei ngei tura tihluih an ni lo tih a sawi a, hemi rual hian hripui leng mek do hneh tur chuan an vaia vaccine an lak chu thil ṭha tak a ni tih a sawi.

Spain hi Europe ram zinga Covid-19 hri leng tuar nasa ber ram zingah a tel a ni. Hripui kai hmuh chhuah hi mi maktaduai 1.8 an chuang tawh a, an zinga 50,000 chuangin an thihpui tawh a ni. EU member ramten an pawm tlan, Pfizer/BioNTech vaccine chu Spain-ah hian pekchhuah ṭan a ni.

Minister chuan vaccine la duh lote hming chu EU member ram dangte  hnenah hriattir a ni dawn tih a sawi a, mahse ram chhunga mipui nawlpui leh thawktute hmuh tura puanzar erawh a ni lo ang, a ti. 

Mipui ngaihdan lak hnuhnung berah Spain mipui zinga 28% chuan Covid vaccine hi lak an tum lo tih an sawi a ni. 

Minister chuan, "Vaccine lak duh lote chuan an tisual niin kan ngai a, mahse duhthlanna siam turin dikna an nei a ni. Hemi rual hian vaccine lak an hlauhthawnna te hi chinfel dan kan ngaihtuah dawn a ni. Vaccine lak hi he hripui leng mek laka kan him theihna tur a ni," tiin a sawi.