Kum 5 chuang tang turin Saudi activist hrem

Saudi Aabia court chuan women rights activist lar tak, Loujain al-Hathloul chu kum 5 leh thla riat tang turin a hrem a, court thutlukna hi ram leh pawl hrang hrangten an sawisel zui nasa hle. 

Hmeichhiate dikna leh an chanvo humhalhna kawnga thawktu pawimawh tak, kum 31 mi Loujain al-Hathloul leh activist dang ṭhenkhatte chu kum 2018 May thla khan firfiaka chetna kaihhnawihah man an ni. Hathloul hi Saudi political system thlak tum leh, national security tiderthawng zawnga cheah puh niin, thiam loh chantir a ni. 

Hathloul hi kum nga chhung ram pawnah a zin khapsak a ni bawk a, mahse a laizawn Lina chuan court sang zawkah an appeal dawn tih a sawi. 

US State department thupuangtu Cale Brown chuan Hathloul hrem a ni chu ṭha lo an tih thu sawiin, chhuah a nih thuai an beisei tih a sawi. United Nations  human rights expert-te pawhin Hathloul an puhnate chu thil awihawm lo tak a ni tiin, chhuah nghal tura an phut thu an sawi.