Pakistan-a thihchilh bomb puakah sipai 13 an thi

Pakistan hmar thlanglam, Khyber Pakhtunkhwa province-ah Inrinni khan thihchilh bomb tih puahah sipai 13 an thi a, civil mi eng emaw zatin hliam an tuar.

He pawikhawihna hi North Waziristan-a Mir Ali-a Khadi Market a thleng a ni a, bomb paitu hian a motor-in bomb disposal unit motor suin, a bomb pai a ti puak niin security official-te chuan an sawi. Bomb puak vang hian a bul hnaia in pahnih in chung pawh a chim a, naupang parukin hliam an tawrh phah bawk.

Pakistan Taliban hnuaia pawl, Hafiz Gul Bahadur armed group chuan thihchilh bomb ti puaktu an nih thu an sawi.

Kum 2021-a Taliban-in Afghanistan-a thuneihna an chelh leh hnu aṭang khan Pakistan ram, Aghanistan ramri hnaih lamah pawikhawihna a thleng ngun hle. Pakistan chuan Taliban-te hian an ram leilung chu Pakistan beihna atana hman phalsakah a puh a, mahse Taliban erawh chuan an pha thung. Khyber Pakhtunkhwa leh Balochistan province-ah kumin chhungin armede group-te pawikhawihna thlen vangin mi 290 vel an thi tawh a, an zinga a tam zawk chu security official an ni.