France in vantlang hmuna mei zuk khapna hmang ṭan

France chuan nimin, June 29, 2025 aṭangin vantlang hmuna mei zuk khapna a hmang ṭan a, he khapna hian beach, park, bus stand bakah school leh library hnaihvai leh swimming pool te a huam.

Mei zuk khapna hmun mei zu mante chu eiru 135 zel chawitir an ni dawn. Khapnaah hian electronic cigarettes erawh sawi tel a ni lo. Cafe leh bar terrace pawh meizuk khapna zingah a tel lo bawk.

Health and family minister Catherine Vautirn chuan May thla khan vantlang hmuna meizuk khap a nih tur thu leh, July 1 aṭanga hman ṭan tur a nih thu lo sawi tawh mah se, nimin aṭang khan hman ṭan a ni ta zawk a ni. He khapna hi a bik takin naupangte hriselna venhimna atana tih a nih thu a sawi. School, swimming pool, library leh naupangten an tawrh theihna tur hmunahte metre 10 huam chinah mei zuk hi khap a ni. Mahse khapna hian bar leh restaurant terrace-te a huam tel lo hi National Committee Against Smoking (CNCT) chuan an sawisel a, heng hmunah hian naupangte pawh an kal ve fo a ni, an ti. Hei bakah e-cigarette khap tel a ni lo chu an sawisel bawk.

France ramah vaihlo leh a kaihhnawih vanga thi hi kum 75,000 vel an awm ṭhin. Kum 2023-ah khan kum 18-75 inkar hmun lia ṭhenaa hmun khat tling lo deuh chu nitin mei zu ṭhin a ni. Sorkarin vantlang hmun mei zuk khap a tum chungchanga mipui ngaihdan lakah an ram mipui 62% chuan an thlawp a ni.