China-in Japan seafood-a khuahkhirhna siam hlip ṭhen

China chuan Japan seafood lak luh khapna a siam chu a hlip ṭhen a, Japan prefecture 47 zinga 37 aṭangin lak luh a remti ta. Prefecture 10 aṭanga lak luh erawh a la remti lo thung.

Japan seafood lak luh khapna hi China hian kum hnih liam ta khan a siam a, hei hi Fukushima nuclear plant aṭanga tui paih chhuahte him tawk lo leh nghawng a neih a hlauhthawn vang a ni. Khuahkhirhan hi hlip ṭhen mah se Fukushima, Gunma, Tochigi, Ibaraki, Miyagi, Niigata, Nagano, Saitama, Tokyo leh Chiba bial chhunga seafood te erawh lak luh a la remti lo. Bial dang aṭanga lak luh a remtihah pawh hian radioactive substance engmah a awm lo tih finfiahna certificate leh health certificate, Japan sorkarin a pek chhuah chu an neih tel a ngai a ni.

China general administraton of customs chuan Fukushima aṭanga tui paihchhuahte sample laa hun rei tak an zirchian hnuah, thil ṭha lo hmuh a nih loh avangin khuahkhirhna pawh hlih ṭhen a ni ta tih a sawi.

Kum 2011-a Japan-a lirnghing na takin tsumami a thlen khan Fukushima plant-a reactor pathumte ti chhiain, he plant-a tuite kum 2023 aṭang khan tuifinriatah paihchhuah ṭan an ni. Expert tam zawk chuan tui paih chhuah hi a him niin sawi mah se, scientist ṭhenkhat chuan eng angin tuifinriat tuiah nghawng a nei dawn tih zirchianna duhthusam a la awm lo niin an sawi thung.

Japan-in nuclear plant-a tuite a paih chhuah hnuah China chuan Japan aṭanga seafood lak luh a hi khap nghal a ni. Japan hian he khapna hi hlip turin a lo ngen fo tawh a, lui lam sa an thawn chhuahte chu mihring hriselna atana him ngei a ni ang tih enfiah zel a tiam hnuah China hian khapna hi a hlip ṭhen ta a ni. Japan aṭanga seafood an lak luh chu uluk taka enfiah zel a ni dawn tih sawiin, food safety standards a zawm lo a nih chuan a ṭul anga hma an lak nghal tur thu an sawi bawk.