SAARC thlakna tur regional bloc thar din tum

Pakistan, China leh Bangladesh chuan South Asian Association for Regional Cooperation (SAARC) thlakna tur regional bloc thar din tumin hma an la mek nia sawi a ni.

SAARC hi kum 1985-a din niin India, Afghanistan, Bangladesh, Bhutan, Maldives, Nepal, Pakistan leh Sri Lanka te an tel a ni. Mahse India leh Pakistan inkar chhiat vang leh, Afghanistan ram chhung boruak ṭha lo avangin he pawl hi hun rei tak aṭangin kalpui chhunzawm a ni tawh lo a, an meeting neih hnuhnung ber pawh kum 2014 daih tawhah a ni. Kum 2016-a Islamabad-a meeting neih tur chu Pakistan firfiakten Jammu and Kashmir-a Indian Army camp an beih avangin India chuan a boycott a, SAARC member dangte pawhin summit-ah an tel loh tur thu an sawi tak avangin ṭhulh a ni a, hemi hnu aṭang hian SAARC anga hma lakna engmah a awm zui ta lo.

Tun hnaiah Pakistan, China leh Bangladesh chuan Kunming, China-ah meeting neiin pawl thar din chungchang hi an sawi ho tel a ni. Regional bloc thar din turah hian SAARC member lo ni ṭhin, South Asia ram dangte pawh sawm an tum tih an sawi.