US-a in ambush-naah kang ṭhelhtu 2 kap hlum

US-a Idaho-ah Pathianni mi pakhatin ram ti kangin, kangmei chhuak ṭhelh tura kalte chu lo changin kangṭhelhtu pahnih chu a kap hlum a, mi dang pakhat a kap hliam bawk.

Pathianni chawhnu lam khan Coeur d'Alene, Idaho hmar lama Canfield Mountain-ah ram a kang a, thuneitute hriattir an nih hnuah kang ṭhelh tura kalte chu pawikhawihtu hian lo changin a lo kap ta a ni. Ram a kan thu hriattir tu hi pawikhawihtu hi nia sawi a ni bawk. Kootenai County Sheriff Robert Norris chuan pawikhawihtu hian high-powered sporting rifle a hmang niin a sawi.

Pawikhawihna thlenna hmunah hian police leh FBI officer 300 chuang tirh nghal an ni a, police sniper-te pawh helicopter-in an kal ve nghal bawk. Ram kang khu nasa tak karah pawikhawihtu zawn hna hi thawh a ni. Darkar eng emaw zat hnuah mobile phone location information hmangin pawikhawihtu ruang hi hmuh a ni a, amah a in tihlum nge police-ten kah hlum tih erawh sawi chian a la ni lo. A ruang bulah a silai pawh hmuh tel a ni bawk.

Thuneitute chuan ram kang hi nimin thleng khan ṭhelh chhunzawm a nih thu an sawi. Canfield Mountain hi hiker-ten an tlawh ṭhin hmun lar tak niin, Seattle khawchhak lam km 420 vela hlaa awm a ni.