US funding tih tawp vangin mi mtd 14 in thih phah thei dawn

US president Donald Trump-a'n ram danga chhawmdawlna an pek ṭhin zinga a tam zawk a tih tawp tak avangin kum 2030-ah mi mtd 14 velin an thih belh phah thei dawn niin The Lancet medical journal-in zirchianna a neihah a tarlang. Heng zinga hmun thuma ṭhena hmun khat chu naupang an ni tih a tarlang bawk.

President Trump hian US-in ram hrang hranga chhawmdawlna a pek ṭhin zinga 80% vel a ti tawp a ni. Funding tih tawp hma hian U.S. Agency for International Development (USAID) chuan chhawmdawlna hna thawhna atana khawvela huapa sum hman ṭhin aṭanga 40% chuang a tum ṭhin. Ram 133-a chhawmdawlna pek a nih dan data an zirchiannaah, reseacher-te chuan kum 2001-2021 inkar khan US puihna avang hian ram ṭhang mek, developing country-ah mi mtd 91 vel nunna chhanhim a nih theih phah niin an sawi.

US-in foreign funding tam zawk an tih tawp tur thu a puan hnu hian Germany, UK leh France pawhin an fund pek hi tih tlem an tum thu an puang zui ve bawk.