Cosmetics thawn chhuah tam lamah SKorea-in US lehpel

South Korea-in hmai leh vun cheina, cosmetics a siamte an lar chho zel a, a vawi khatna atan khawvel huapa cosmetics thawn chhuah tam lamah US a lehpel a, France ram chiah a pha ta lo a ni.

Korea International Trade Assocation chuan kumin January-April chhung khan ram danga cosmetics an thawn chhuah hi USD tld 3.61 a tling tih an sawi a, US thawn chhuah hi USD tld 3.57 a ni thung.

K-beauty tia sawi mai, South Korea cosmetics hi Europe bakah Middle East lamah an thawn chhuak tam zual a ni. KITA in a tarlan danin, nikum chhunga Korea cosmetics thawn chhuah chu USD tld 10.3 tlingin Germany a lehpel a, khawvela cosmetics thawn chhuak tam pathumnaah a inhlangkai a, kuminah US pel lehin pahnihna a rawn ni leh thei ta a ni. France leh US in cosmetics an thawn chhuah punna hi 6.3% leh 11% a nih laiin, SKorea punna hi 20.3% a ni pha thung.