Dalai Lama'n a Trust chauhin a thlaktu tur thlang thei tih a sawi

Tibet sakhaw hotu, Dalai Lama chuan amah thlaktu, a pian nawn lehna thlang theitu chu non-profit organisation a din, Gaden Phodrang Trust chauh a ni tih a sawi. Dalai Lama Trust official chuan Dalai Lama thlaktu tur hi mipa emaw hmeichhia emaw pawh a ni thei a, eng ram mi pawh a ni thei bawk tih a sawi ve nghal bawk.

Dharamshala, India-a 15th Tibetan Religious Conference hawnnaah Dalai Lama video message tih chhuah a ni a, a thih hnuah Dalai Lama hi a la awm chhunzawm zel dawn em tih zawhna awm chu a rawn sawichiang ta a ni. Pathiannia kum 90 tling tur, Dalai Lama hian "Dalai Lama hi a la awm chhunzawm zel dawn a ni," a ti. Conference-ah hian monk 100 chuang an tel bakah, khawvel ram hrang hrang aṭangin journalist an kal bawk a, Hollywood star Richard Gere pawh a tel a ni.

Dalai Lama hi China rorelna lak aṭanga Tibet lak hran tuma beihna a hlawhchham hnuah kum 1959 khan India ramah a tlanchhia a, China chuan an ram laka hel, inlakhranduhtu leh Tibet mite fuih dik loah a puh. Dalai Lama thar tur pawh hi China chuan an thlang tawh dawn tih a lo sawi tawh bawk. Mahse Dalai Lama chuan hei hi pawm loin, amah thlaktu tur chu China pawn lama piang ngei a ni tur a ni a, China thlan chu pawm lo turin amah zuitute pawh a lo chah tawh bawk.