Dalai Lama'n kum 90 a tling ta

Tibet sakhaw hotu, Dalai Lama chuan nimin khan kum 90 a tling a, ram hrang hrang hruaituten duhsakna an hlan.

Dalai Lama hi kum 1959-a China rorelna lak aṭanga inlakhran tuma an beihna a hlawhchham hnuah India ramah tlanchhiain, Himachal Pradesh-a Dharamsala ah a khawsa zui a ni. Nimin khan a piancham lawmpui turin ram hrang hrang aṭangin amah zuitu mi tam tak chu Dharamsala-ah an kalkhawm a ni.

Dalai Lama 14-na, a hming tak Tenzin Gyatso hi kum hnih mi lek a nih laiin Dalai Lama 13-na pian nawnna nia pawm a ni a, kum nga a nihin Dalai Lama nihna hi dan ang taka hlan a ni. Kum 15-ah Tibet sakhaw hotu a ni tawh bawk.

Kum 1900 chhoah Tibet hian ro in inrel hran mah se, China chuan Tibet chu a ram peng pakhatah a ngai reng a ni. Kum 1949-a Moa Zedong-a'n thuneihna a chan hnuah, China-ah beh tir an tum a ni. Mahse Tibet hian a lo duh loh avangin China chuan Tibet khawchhak lam province chu kum 1950, October thlaah a run a, 1951-ah inremna, “Agreement for the Peaceful Liberation of Tibet” chu ziak mah se an in ep chhunzawm reng tho a ni. Kum 1959-ah China laka inlakhran tumin an bei a, mahse China lam chuan a tukdawl zui nghal thung. Hei vang hian Dalai Lama hi India ramah tlanchhiain, mi 80,000 velin an zui bawk. Hemi aṭang hian Dharamsala-ah Dalai Lama hi khawsa zuiin, ram pawn lama Tibet sorkar pawh an din zui a ni.

China chuan Dalai Lama hi sorkar laka hel leh Tibet lak hran tumah a puh a, mahse Dalai Lama chuan China laka inlak hran ni loin, China dan hnuaiah tho Tibet-in a inrelbawlna kawnga thuneihna sang zawk an neihna turin a bei niin a sawi thung. An buaina chinfelna turin a aiawhte pawhin China thuneitute chu inbiakna pawh an lo neihpui fo tawh a ni. Tibet tana a hmalakna avang hian kum 1989 khan chawimawina sang, Nobel Peace Prize hlan a ni bawk.