Khawvel pumah Covid-19 vanga thi nuai hnih chuang tawh

Nimin thleng kha chuan khawvel puma Covid-19 vanga thi chu mi nuai 203,308 an tling tawh a, hri kai hi mi maktaduai 2,923,285 an awm tawh bawk a ni. 

Tunkar chho hian hri kai hi mi maktaduai 3 an tlin chhoh rin a ni a, thi zinga a zahve chu United States, Spain leh Italy a mi an ni.  Covid-19 vanga thi hmasa ber chu China-a Wuhan khuaa mi niin, January 10 khan a thi tih China media-te chuan an tarlang.

Hri vanga thi hi ni 91 chhungin mi 100,000 an tling hman a, hemi hnu ni 16 chhung hian thi hi mi 2,00,000 an tling chho leh hman bawk. 

United States-ah hian Covid-19 avanga thi hi nimin thleng kha chuan mi 54,265 an awm tawh a, he hri vanga thihna tam berna ram a ni mek a ni. A dawtah hian Spain an awm leh a, anni ramah hian hri vanga thi hi mi 22,902 an awm tawh bawk. Europe khawmuala Covid-19 tuar nasa ber, Italy-ah hian hri vanga thi hi mi 26,384 an awm tawh bawk a ni

. 

Covid-19 vangin Belgium-ah hian mi 10,000 zelah mi 6 an thi ang a ni a, US leh Spain-ah hian mi 1.6 leh 4.9 thi zel ang ve ve a ni bawk. US-ah hian hri kai zawng zawng aṭanga 8% chu he hri vanga thi ang a ni a, Spain leh Italy-ah hian 10% aiin  an tam ve ve thung.

Asia leh Latin America ram aṭangtein Covid-19 vanga thi hi mi 7,000 an chuang tawh a, he hri vanga Middle East-a thi hi mi 8,800 an chuang tawh bawk. Africa-ah hian mi 1,379 chu he hri vang hian an thi tawh bawk a ni. 

Ni 10 liam ta khan Covid-19 vanga thihna hi 3-4% in a pung chho a ni. Ram ṭhenkhatten thi leh hri kai kimchang an tarlan ṭhin loh vangin hei ai hian hri vanga thi leh hri kai hi an tam rin a ni bawk.