Pá hmanga mi pathum thata puh thiam loh chan tir

Australia-a Morwell khuaa jury chuan kum 2023-a tur nei chi pá hmanga mi pathum ti hluma puh, kum 50 mi Erin Patterson-i chu nimin khan thiam loh a chantir. Mi pathum thatah puh a nih bakah mi dang pakhat tih hlum tuma puhnaah pawh thiam loh a chang bawk a ni.

Erin Patterson hian a pasal nu leh pa, Gail Patterson leh Donald Petterson bakah Gail-i laizawn, Heather Wilkon leh Heather-i pasal Ian Wilkinson-te chu kum 2023 khan Leongatha-a a chenna ina chaw chhun a eipuinaah an ei tur, beef Wellingto pastry-ah tur nei chi pá hi a lo telh a ni. An pali hian damdawi-ina hruai an nih hnuah Ian Wilkonson tih loh mi dang pathumte chu an thi a ni. An thil eiah tur nei pá telh a ni tih hriatchhuah a nih avangin Patterson hi thubuai siamsakin chhui zui a ni ta a ni.

Patterson hi cancer a vei nia dawt sawiin, a inah chaw chhun ei turin mi palite hi a sawm a, an ei turah hian tur hi a lo telh ta niin prosecution chuan court an hrilh. A tirah chuan amah an rinhlelh lohna turin a ei tur siam hi a ei ve thu leh, amah pawh a damlo ve niin a sawi. Mahse police-ten an chhui zui hnuah a phuahchawp mai mai a nih thu a sawi leh a ni, an ti.

Patterson chungthu hi kar sawm chhung ngaihtuah a ni a, Australia ram chhung chauh ni lo ram pawn lam thleng pawhin an ngaihven hle. A ukil-te chuan he thil thleng hi tihpalh thil a nih thu sawiin, Patterson hian ei tur tihtuina atan a telh a ni an ti a, thu zawhfiahnaa police-te dawt a lo hrilh fona chhan pawh a chiai lutuk vang a ni, an ti. Mahse hei hian jury 12-te rilru a hneh zo lo a, Patterson chu tum reng vanga a mikhualte ei tura tur telh leh, public website-ah an awmna hmun a hmuh hnuah tur nei chi pa pawh hi la a nih thu an sawi thung.