China-in medical expert-te North Korea-ah tir

China chuan kar liam ta Ningani khan medical expert-te North Korea-ah a tir tih media-te chuan an tarlang.

China-in North Korea-a medical expert a tirh chhan hi hriat chian ni lo mah se, an hotupa Kim Jung Un a dam ṭhat loh avanga enkawl tura kal nia ngaih an ni. Medical expert-te hi Chinese Communist Party`s International Liaison Department-a senior official-in a ho nia sawi a ni a, hemi chungchangah hian  China foreign ministry chuan thu­chhuah engmah a siam lo.

Kar liam ta aṭang khan Kim hi a thi niin media ṭhenkhatte chuan an tarlang a, South Korea online newspaper Daily NK chuan April 12 khan Kim hian lung lam ṭha lo a neih avangin, cardiovascular system procedure hmanga enkawl a nih thu a tarlang a ni. 

April 15-a North Korea hnampa Kim Il Sung (Kim-a pu) piancham lawmnaah Kim hi a kal lo niin media-te chuan an sawi bawk. Kim hi kar hnih chhung vantlang hmuhah a inlan tawh lo a, hengte avang hian a dam ṭha lo nia sawi leh, a thi nia sawi thawm a tam hle. 

US president Donald Trump chuan kar liam ta Ningani khan Kim chungchang hi sawiin, a thi nia sawi chu thudik a nih a rin loh thu a sawi.  U.S. intelligence lam chuan Kim hrisel loh thu hi chu an hria a,, mahse thih ngam khawpa a nat thu erawh an hriat loh thu an tarlang. Kar kal ta Zirtawpni khan South Korea media ṭhenkhatte chuan Kim hi a dam thu an tarlang a, mahse a chanchin kimchang erawh sawizui tur an hre bik vak lo thung. 

NKorea hi khawvela ram inlahrang ber zinga mi niin, an ramchhung chanchin pawh hriat a har leh a, an ram hruaitute hriselna dinhmun phei chu puanzar a ni ngai lo. 

Kum 2014 khan Kim hi thla khat ai tam vantlang hmaah a lo inlan lo tawh a, a hnuah North Korea state TV pakhatin dam ṭhat hmel loh taka a kal lai a tilang a ni. Kum 36 mi Kim hi a thau vang leh meizial zuk nasat leh hna a thawh nasat avangin a hrisel lo tih Daily NK chuan a tarlang. 

Nikum khan China president Xi Jinping chu North Korea tlawhin a zin a, Jinping hi kum 14 hnua North Korea-a China hotu zin leh hmasa ber a ni.

Kum 2008 khan Kim-a pa Kim Jong Il chu stroke vangin a damlo vak tawh a, hemi ṭum hian China leh France doctor-te  chuan Kim-a pa enkawl hna hi an thawk tih South Korea media-te chuan an sawi. China leh North Korea hi economics lamah leh kawng hrang hrangah inzawmna ṭha tak an nei a ni. 

Kum 2011 khan heart attack vangin Kim-a pa hi a boral a, hemi hnu hian Kim hi a NKorea hotuaha awm zui a ni. Kum 2018 hnuah Kim hi  vawi li lai China-ah a zin tawh a ni.