Donald Trump duh lotuten lungawi lohna lantir

US President thlanna neih zawh takah Republican Party candidate, Donald Trump chu President 45-na turin thlan tlin a ni a, hetihlai hian khawpui hrang hrangah Trump-a duh lotuten lungawi lohna an lantir.

New York, Chicago leh khawpui dangahte mi tam tak pungkhawmin, US flag-te an hal a, Trump-aín campaign laia an rama pemlut leh Muslim awmte laka hma lak a tum dan a sawite chu na takin an sawisel. New York-ah chuan mi ṭhenkhatin Trump Tower bulah Donald Trump chu, an President a ni thei lo ti tein an aurual a ni.

Chicago-ah pawh Trump International Hotel kawtah mi sang chuang an pungkhawm a, US-a chi inthliarna kalpui an duh loh thu an sawi. Pungkhawmte hi police-teín an lo dang a ni. Trump hian a campaign au hla-ah an rama dan lo leh, document fel lo chunga pem lutte chu thawn haw a tum thu te, Mexico leh US ramri hung a tum thute a lo sawi tawh a, hei hian mi tam tak a nghawng dawn nia sawiin, chi inthliarna kalpui tumah an puh.

Hetih lai hian President atana thlan tlin a nih hnua a thusawi hmasa berah, Trump chuan America mipui zawng zawng tana president a nih tur thu sawiin, ram mipuite chu lungrual taka an thawhho a ngai tih a sawi.

January 20, 2017-a US President tura lakluh a nih hnuah Donald Trump hian US Constitution leh US law hmangin, thuneihna pawimawh tak tak a kutah dah a ni nghal ang. US sorkar kalphung hi branch thum - executive, legislative leh judicial-in ṭhen ni mah se, Congress-a in hnih, House of Representative leh Senate-ah Republican hi an chak bawk avangin Trump-a hian thil a tihtheih phah zual hle rin a ni.