SKorea President ban phutin kawng zawh leh dawn

South Korea President Park Guen-hye-i chu ram inrelbawlna kawngah a ṭhianṭha a inrawlh tir chungchangah a hmingchhe hle a, eptu lam chuan bang turin an nawr reng a, kartawpah hian President duh lohna lantirin kawng zawh an huaihawt leh dawn.

Civil group 1,500 vel chuan Inrinni hian Seoul-a city hall square-ah President Park-i bang tura phutin kawng zawhpui huaihawt an tum thu an sawi. President duh lohna hi Inrinni vawi hnih an lo lantir tawh bawk.

Police-te chuan Inrinni-a kawng zawh neih turah hian mi 160,000 - 170,000 vel an tir an rin thu an sawi a, mahse a huaihawttute chuan mi nuai nga an tling dawn niin an sawi thung. Kar kalta Inrinni-a kawng zawhnaah khan mi nuai hnih vel an tel a ni.

President Park-i hian ṭum hnih an ram mipuite hmaah thupha a chawi tawh a, amah an chhui chiang dawn a nih pawhin a pawm tur thu a sawi. Mahse thupha a chawina hi ram mipuite chuan an pawmsak lo a, bang turin an nawr chhunzawm reng a ni.