SKorea, Japan leh US air drill nei

South Korea, Japan leh United States chuan nimin khan Korean Peninsula-ah joint air drill an nei a, a vawi khatna atan US B-52H bomber pawh a tel.

Joint air drill neih lai hian nimin vek khan ram pathum defence hotute chu Seoul-ah an inhmu bawk a, defence lama thawh hona ṭha leh nghet zawk siam a ṭul thute an sawi. US Joints Chiefs of Staff chairman, general Dan Caine chuan North Korea leh China chuan an thil tih tum nawrna turin an sipaite an thuam chak zel a, hei hi an ngaihven tel reng a ngai tih a sawi. NKorea leh Russia-in an sipaite thawh dunna nghet zawk an siam chhoh avangin SKorea, Japan leh US pawh hian security lama an thawh hona pawh an ti lian ve zel bawk a ni.

Hetih lai hian Russia foreign minister Sergei Lavrov chuan nimin khan NKorea a tlawh a, NKorea hotute nen high-level meeting an nei dawn a ni. SKorea intelligence service chuan NKorea hi Ukraine nena indo mek, Russia pui tura sipai thawn belh leh tumin an inbuatsaih niin a tarlang.