Palestinian thlawptuin US sorkar a khing

US-a univeristy campus hrang hranga Palestian thlawpna lantira nawrh huaihawtna neih ṭhina an hruaitu pakhat, Mahmoud Khalil chuan US president Donald Trump kaihhruai sorkar chu immigration agent-ten an man leh hren avangin USD mtd 20 chawi turin a khing.

Kum 30 mi, Khalil hi US-a dan anga khawsa nghet niin, US citizen nupuiah a nei a, a fapa pawh US-a piang a ni.

Gaza Strip-a Israel-Hamas indona thlen hnua Palestinian thlawptuten US university hrang hrang campus-a nawrh an huaihawtna kal zelah, dan loa US-a lutte dap hna kalpui a nih hnuah Khalil hi March thla khan man a ni a, judge in bail-a dilna a pawmsak hnuah June thla khan Lousiana-a immigration detention center aṭangin chhuah a ni.

Center for Constitutional Rights chuan Khalil-a'n US sorkar khin a tumna hi an thlawp tih sawiin, dan kalhin man leh hren a nih bakah thawn haw tum a ni a, hei hian amah leh a chhungte pawh a ti thlabar hle a ni, a ti.

Hetih lai hian President Trump kaihhruai sorkar chuan Khalil chu an ram security tana him lo leh ti derthawng thei niin a puh ve thung. An ram lama thawn kir tum a nihna chhan pawh US-a a awm ve reng chuan foreign policy thlengin nghawng pawi tak a nei thei dawn a ni, tiin a sawi.