Italy-in May 4 aṬangin Lockdown thlahdul dawn

Italy chuan coronavirus vanga ram puma lockdown a puan chu May 4 aṭangin a thlahdul ṭan dawn. Hri leng darh zel tur venna atan Italy-ah hian kar sarih chhung lockdown hi kalpui a ni tawh a ni. 

Prime minister Giuseppe Conte chuan May 4 aṭang chuan inkharkhipna hi thlahdul ṭan a ni dawn tih sawiin, chhungte intlawh tawn pawh phal a ni tawh dawn tih a sawi. Park leh factory-te pawh hawn an ni tawh dawn a, school erawh chuan September thla hma chu khar an la ni ang. 

Italy ramah hian Pathianni khan Covid-19 vangin mi 260 an thi a, hei hi March 14 hnu lamah hri vanga ni khata thi an tlem ber ṭum a ni. Italy ramah hian he hri kai hi mi 197,675 an awm a, mahse hri kai thar zat hi an tlahniam ṭan tawh a ni. 

US-ah pawh state tam zawkin  hri leng vanga khuakhirhna an siamte chu thlahdul ṭan an tum. 

US hi Covid-19 kai tamna ber ram a ni tawh a, mahse hetichung hian lockdown kalpui mek chu duh loin nawrh te huaihawt a ni. Health expert-te chuan mipuite chhuah khawm a, an awmkhawm leh chuan hri leng hian zual lam a pan zel an  hlauhthawn thu sawi mah se, state tam zawk chuan hna thawk thei loa awm hian an state economy a nghawng avangin hna thawh chhunzawm an duh tawh a ni. Thla  khat chhung inkharkhip a, hna thawk thei loa an awm avangin America-a hna nei lo zat hi April thla hian 16% an tling chho dawn nia sawi a ni. 

Hri leng hluarna, New York leh state ṭhenkhat chuan May thla laihawl thleng khuahkhirhna la kalpui an tum. Hetih lai hian Colorado, Mississippi, Minnesota, Montana leh Tennessee chuan khuahkhirhna thlahdul an tum thung. Georgia, Oklahoma, Alaska leh South Carolina state te pawhin hna thawh chhunzawmna turin hma an la ṭan tawh bawk. 

State pariat - Arkansas, Iowa, Nebraska, North Dakota, Oklahoma, South Dakota, Utah leh Wyoming-te chuan an state-ah pawnchhuah khapna hi an kalpui ve lo thung a ni. 

Britain prime minister Boris Johnson chuan khuahkhirhna siam mek thlahdul mai chu a la hlauthawnawm hle niin a sawi thung. 

Covid-19 a kai avanga thla khat dawn enkawl a nih hnuah Johnson hian nimin  aṭang khan a hna a thawk chhunzawm leh a, Downing Street pawnah press conference a nei a ni. 

Johnson chuan hri leng avanga inkhar­khipna kalpuiin an rama sumdawngte a nghawng dan pawh a hriatthiam pui tho  tih a sawi a, hma lak zel dan turah eptute pawh a biakrawn tur thu a sawi. Hemi rual hian lockdown hlih nghal mai erawh ṭha a la tih loh thu a sawi. Kar ruk kalta chhunga hri don tura an ram mipuiten lungrual taka hma an lak anga an chhunzawm zel chuan, he hri leng pawh hi an do hneh thei ngei dawn niin a sawi. 

Britain hi coronavirus leng tuar nasa ber ram zingah a tel a, mi 20,732 in an thihpui tawh a ni.