Kim Jung Un a thi lo : SKorea official

North Korea ram hotu Kim Jung Un chu a la dam a ṭha e, tiin South Korea president top security special adviser, Moon Chung Un chuan nimin khan CNN-in an kawmnaah a sawi.

Kim hi North Korea chhim chhak South Korea nena inrina Kangwon Province-a Wonsan khuaa tourist resort-ah a awm niin Moon Chung Un chuan a sawi a, April 13 aṭang khan he lai hmunah hian a awm tih a sawi bawk. 

Wonsan khuaa South Korea media-te tarlan dan chuan, Kim hian tourist resort-a thawkte message a thawn niin Chung Un chuan a sawi. 

April 15 khan Kim hi a pu piancham lawmnaah a tel ve lo niin media ṭhen­khatte chuan an tarlang a, a hriselna a ṭhat loh avangin a thi a ni tiin media ṭhenkhatte chuan an tarlang bawk. South Korea online newspaper Daily NK chuan lung lam ṭha lo a neih avangin an zai thu pawh a tarlang nghe nghe. 

Kim hi April 11-a Wokers' Party politburo meeting a kaihruai tih loh kha chu, a chanchin hi North Korea media lam hian an thai lang leh tawh lo a ni. Kar hnih chhung vantlang hmuhah a inlan tawh loh avang hian Kim hi a thi ta niin miṭhenkhatte chuan an ngai. 

Washington-a North Korea monitoring project, 38 North chuan satellite thlalak hmangin Wonsan khuaa special train-ah Kim hi a chuang niin a tarlang a, mi ṭhenkhat chuan he spe­cial train hi Kim-a mimal train (rel) niin an sawi.

Media ṭhenkhat chuan Kim hi Covid-19 vangin Wonsan khuaah hian a bibo niin an sawi a, hei hi thudik tak a ni em tih finfiah erawh a awm lo thung.