Israel ṭangrual sorkar aṭangin ultra-Orthodox party a bang

Israel ultra-Orthodox party, United Torah Judaism (UTJ) chuan prime minister Benjamin Netanyahu kaihhruai ṭangrual sorkar aṭanga banna an theh lut. Hei hi ṭhalaite sipai ṭang ngei ngei tura tihnaah yeshiva zirlaite ngaihnathiam tura an phutna tih hlawhtlin a nih loh vang a ni.

June thla khan UTJ chairman, Yitzhak Goldknopf chuan banna a lo thehlut tawh a, Thawhlehni khan member dang parukte chuan banna lehkha an theh lut ve leh a ni.

UTJ an ban hnuah Netanyahu hian member 120 awmna parliament, Knesset-ah thlawptu 61 la neiin, majority a la nei pha hram a ni. Mahse ultra-Orthodox party dang, Shas hian an chhuahsan dawn em tih a la chiang lo a, anni party hian an chhuahsan ve leh chuan majority a nei tawh dawn lo.

Ultra-Orthodox party pahnihte hian kum 2022 kum tawp lama ṭangrual sorkar an zawm dawn khan an thil phut zingah military service-ah yeshiva zirlaite telh ve loh a tel a ni. An ram danah ṭhalaite military service-a ṭang vek tura tih a nih laia, sakhaw bil zirlaite ngaihnathiamna siam hi Parliament member dangte chuan an thlawp lo thung. A hma zawng khan ultra-Orthodox hi ngaihnathiam an ni ṭhin a, mahse nikum khan Supreme Court chuan defence ministry hnenah ngaihnathiamna siam hi ti tawp turin a lo ti a ni.