Zelenskyy-a'n Ukraine PM thar atan Yulia Svyrydenko ruat

Ukraine president Volodymyr Zelenskyy chuan deputy prime minister Yulia Svyrydenko-i chu an ram prime minister thar atan a ruat. Parliament-in a pawmpui ve leh phawt a ngai ang.

PM thar atana ruat, Svyrydenko-i hi kum 39 mi, economist a ni. Kum 2021 aṭang khan deputy prime minister hna hi a chelh a, tun hnaia US nena minerals lama inremna an siamah pawh khan mi pawimawh tak a ni. A hmain economic development leh trade minister pawh a lo ni tawh bawk.

Parliament-in Prime Minister atan Svyrydenko hi a pawm a nih chuan Denys Shmyhal a thlak dawn a ni. Denys Shmyhal hian kum 2020 aṭang khan PM dinhmun hi a chelh a, kum 1991-a Russia aṭanga Ukraine a in lak hran hnuah an rama sorkar hotu dinhmun chelh rei thei ber a la ni.

President Zelenskyy chuan defence minister atan Shmyhal hi a rawt leh nghal dawn tih a sawi bawk a, tawnhriat ṭha tak a lo neih tawh chu he dinhmun atan hian a pawimawh dawn hle a ni, a ti. A rawtna hi pawm a nih chuan defence minister nilai Rustem Umerov a thlak ang a, Umerov hi US-ah ambassador atan ruat a ni rih thung.