An ramah kutdawh an awm lo tih sawitu Cuba Minister a bang

Cuba labour minister, Marta Elena Feitó Cabrera chu Cuba ramah kutdawh an awm lo tia a sawi avanga bang tura nawr a nih hnuah Thawhlehni khan banna a theh lut.

Minister hian tun kar tir lama Parliament session neihah Cuba ramah kutdawh an awm lo a, bawlhhlawh paihkhawm hai ṭhinte pawh kutdawh ni loin, awlsam zawka sum hmuh an duh vanga kutdawh anga awm mai zawk an ni, a ti. A thusawi hi ram chhung leh ram pawna Cuba miten an sawisel nasa hle a, president Miguel Díaz-Canel pawhin session-ah a sawisel tak hnuah Feitó Cabrera hian banna a theh lut ta a ni.

Cuba rama sum dinhmun hi a ṭhat loh avangin mi rethei an tam a, ei leh in tura indaih tawk lohna pawh a nasa hle. Hetiang dinhmun an nih mek laia Minister-in kutdawh an awm lo, mi rethei ei hmuhna tur dapa bawlhhlawh dah khawmna hmun hai ṭhinte pawh kutdawh lem chang mai mai tia a sawi chu mipui lamin an helh hle. Feitó Cabrera hian bawlhhlawh hai ṭhinte chu dan phal lohah recycling service-a telte an ni tih a sawi bawk.

Feitó Cabrera thusawi hi Cuban activist leh intellectual lamin an saiwsel nasa hle a, bang tura phutin lehkha pawh an thawn hial. Minister thusawi chu Cuban mipuite hmuhsitna a ni, tiin an sawi.

President Miguel Díaz-Canel pawhin Parliament session-ah Minister hi hminghmerha sawi chhuak loin a thusawi chungchang hi a sawi zui a, ngaihtuahna nei lo leh mipuite dinhmun dik tak hrechiang loa thu sawi mai tur a nih loh thute a sawi chhuak a ni.