China-in enthlatua puh Japan mi kum 3 chuang tang turin hrem

China court chuan nimin khan enthlatua puh, Japan sumdawng mi pakhat chu thiam loh chantirin kum thum leh a chanve tang turin a hrem.

Beijing-a Japan embassy chuan court thutlukna siam hi puangin a hming erawh a tarlang tel lo thung. Japan-a pharmaceutical company lian, Astellas Pharma Inc. a thawk niin kum 60 vel a ni. Kum 2023 March thla khan man niin, hemi kum August thla hian enthlatua puhna thubuai siamsak a ni. November thla aṭangin a thubuai hi ngaihtuah ṭan a ni bawk. Mahse enthlatua puh a nih dan leh thubuai siamsak a nih dan kimchang hi puanzar a ni lo. China ramah kum 20 vel hna thawkin a awm a, Japan rama haw a tum laiin man a ni ta nia sawi a ni.

Intermediate People’s Court-a a chungthu ngaituah a nih lai hian China-a Japan ambassador Kenji Kanasugi chu a awm phalsak a ni a, mahse Japan reporter te erawh an awm phal a ni lo thung. Court thutlukna siam dan chu Japan embassy chuan sawiselin, thil awm lo tak a nih thu a sawi.

Kum 2014-a China in anti-spying law a hman ṭan aṭang khan enthlatua puh Japan mi 17 chu hren an ni tawh a ni. An zinga a tam zawk chhuah ni tawhin, panga erawh an la tang mek thung. Japan chuan an mi leh sa hren mekte hi chhuah turin a ngen fo a, hei bakah an chungthu ngaihtuahna pawh langtlang taka kalpui turin a phut bawk.