Bangladesh security force leh Hasina thlawptute in nawr buai

Bangladesh security force leh prime minister aṭanga paihthlak tak, Sheikh Hasina thlawptute chu Nilani khan Gopalganj district-ah an in nawr buai a, mi pali an thih bakah hliam eng emaw zat an awm.

Prime Minister a nihna aṭanga Hasina paihthlak a nih theihna atana nikuma nawrh huaihawtnaa a bul tumtu ber, zirlai pawlten political party thar an din, National Citizen Party in Gopalganj district-ah kawng zawh huaihawt an tum avangin buaina hi a chhuak a ni. Gopalganj district hi Hasina chawr chhuahna niin, a party Awami League chakna a ni bawk.

National Citizen Party buatsaih kawngzawhnaa tel tur an hruaitute phurtu motor 20 vel chu Hasina thlawptute hian an lo dang a, venhim hna thawktute an beih tel bakah motor ṭhenkhat hi an hal bawk. Beih an tawh avangin party hruaitute hi police office-ah an tlanchhe zui a ni. Security force-ten pungkhawmte hi hnawh darh an tum a, anni hian hmanrua nen an bei let ve bawk a ni.

Bangladesh sorkar hotu, Muhammad Yunus chuan Gopalganj-a tharum thawhna thleng chu a dem thu sawiin, zirlai pawl hruaitute beitute chu hrem lohin an chhuak dawn lo tih a sawi. Pawikhawihna thlenga mawhphurtute chu darkar 24 chhung ngeia man turin thuneitute chu hun an pe tih zirlai pawl hruaitu, Nahid Islam chuan a sawi. Gopalganj ṭhenawm, Faridpur district-ah kawng zawh huaihawt an tum leh tih a sawi bawk.

Hetih lai hian Awami League chuan X lamah buaina chhuaka thi leh hliam an awm chungchangah sorkar chu mawhphurtuah puhin an dem thu an sawi. Mipuite laka security force-te chetdan chu ram dang pawhin dem tura an duh thu an tarlang.