Houthi-in Ben Gurion airport an kap tih sawi

Israel sipaiten Yemen aṭanga missile kah chhuah lo dangin an kap thla tih an sawi hnuah, Yemen helpawl chuan missile hi Israel-a civilian airport pawimawh, Tel Aviv bula Ben Gurion International Airport beihna atana an kah chhuah a ni tih an sawi.

Houthi thupuangtu, Yehya Saree chuan "Zulfiqar ballistic missile" leh drone in Ben Gurion airport hi an kap tih an sawi, hei bakah Israel chhim lam lawngchawlh hmun, Eilat pawh drone in a kap tih an sawi bawk. Houthi hian Gaza Strip-a Israel-Hamas indona thlen hnuah, Palestinian te a thlawpna lantirin Israel hi ṭum eng emaw zat a lo bei tawh a ni.

Hetih lai hian Yemen-a sorkar thlawptu, Yemeni National Resistance Forces chuan Nilaini khan Iran aṭanga Houthi ho hman tura thawn, ralthuam ton 750 zeta rit chu an lo mansak tih an sawi. US Central Command chuan Yemen pawl thiltih chu fakin, ṭum khata helpawl tana Iran ralthuam thawn an man hnem ber ṭum a ni, a ti.

Yemeni National Resistance Forces hotu, Tarek Saleh chuan an ralthuam man zingah hian naval leh air missile system, air defence system, modern radar, drone, monitoring device, anti-tank missile, B-10 artillery, tracking lenses, sniper rifle leh sipai hmanraw dangte a tel tih a sawi.