SKorea-ah ruahsur nasa avangin mi 1,000 chuang sawn chhuak

South Korea-a South Chungcheong bialah ruahsur nasain chhiatna a thlenah mi pahnih an thi a, nimin khan mi 1,000 chuang chu hmun him lamah sawnchhuah an ni.

Nilaini khan ruahsur vanga bang rem chimin motor a delh a, motor khalhtu hi a thi a ni. Ani bakah mi dang pakhat chu kawtthlerah tui tling nasa avanga a motor a din laiin heart attack a nei a, damdawi-ina hruai a nih hnuah a thi. Hmun dangah ruahsur kaihhhnawih avangin naupang pahnihin hliam an tuar bawk.

Ministry of the Interior and Safety chuan Nilaini aṭang khan South Chungcheong bialah hian ruah a sur nasa hle tih sawiin, Season chu a sur nasatna ber niin ruahtui tla hi mm 344 a tling. Nilaini zing dar 1:46 - 2:46 inkar, darkar khat chhung lekin ruahsur hi mm 114.9 a tling a, kum 1968-a chhinchhiahna fel tak an siam hnu aṭangin Nilaini zinga ruahsur hi July thlaa darkar khat chhunga a sur hnem ber ṭum a ni. Korea Meteorological Administration chuan Chungcheong bakah an ram chhim lam hmun dangah pawh ruah hi a la sur chhunzawm dawn niin a tarlang.

Ruahsur nasa avang hian Chuncheong bial chhung hmun hrang hrangah lei a min a hlauhthawnawm avangin thuneitu lam pawhin fimkhur tura hriattirna an ti chhuak a ni. Gwangju khawpuiah chuan kawngpui 87 leh building 38 chu tuiin a chim tawh a ni.